Da Bauer håt an wuidn Stier, wim-bra-wim-bam-bumm,
dem konnst beim Wachsn zuaschaugn schier, wim-bra-wim-bam-bumm,
da ganze Stoiz von seiner Mast, wim-bra-wim-bumm, heirassa,
12 Zentner håt des Viecherl fast, wim-bra-wim-bam-bumm!

Des Kraftfuatta aus Wimprating,
des is des reinste Bodybuilding!
Der Stier der frißt ois wia net gscheit,
am Tiermehl håt er hoit sei Freid.

Und wia da Bauer vom Wirt hoamkimmt,
då merkt er glei, daß wås net stimmt.
Då foit er umanand, da Stier,
wia er mit seine fünf Maß Bier!

Von Tåg zu Tåg is' schlimmer worn,
des Viech kennt nicht mehr hint und vorn.
Då deans an Tierarzt telephoniern,
er soi dem Stier sein Rausch kuriern!

Jetz stengas um des Rindviech rum
und schaugn ois wia da Stier, so dumm.
Da Doktor sågt: "I moan oiwei
der Rausch geht net so schnoi vorbei!"

Jetz hoins an Böck, vom Bauernverband,
am Sonnleitner sei rechte Hand:
"Då deaf' ma jetz koa Zeit verliern,
da Metzger muaß den Rausch kuriern!"

An Stempi kriagt er, auf dem steht:
"Deutsche Spitzenqualität!"
Jetz kimmt da Vincenc Murr vorbei,
der suacht a Fleisch für d'Staatskanzlei!

Im Zirbelstüberl deans heit feiern,
mit einem Stier aus Oberbayern.
D' Barbara Stamm haut nei ois wia net gscheit,
am Stierbeutl håts hoit a Freid!

De Hirnsuppn is bsonders gschmåch,
da Wiesheu legt glei dreimoi nåch,
Da Stoiber sågt: "Ja, des is gwiss,
daß Bayern BSE-frei is!"

Drum deats de Landwirtschaft erneuern,
ois ersts vom Rindviechstandort Bayern!
Fangts mitm Schnelltest gegn den Rinderwahn
bei der bayrischen Regierung an!